Ginpahanumdom sang Bureau of Fisheries and Aquatic Resources (BFAR)-Capiz ang publiko, ilabi na ang mga manugpangisda, nga untaton na ang paggamit sang illegal nga explosives sa pagpangisda bangud nagahatag ini sang peligro sa kabuhi sang tawo kag nagahalit sa marine ecosystem.
Sa interview sang Bombo Radyo kay Sylvia V. Dela Cruz, Agricultural Specialist kag Consultant, iya ginpahayag nga ang paggamit sang explosives sa pagpangisda isa ka delikado kag makahalalit nga pamaagi bangud indi lamang ang target nga mga isda ang apektado kundi pati ang iban pa nga marine species kag ang ila puluy-an sa idalom sang dagat.
Suno kay Dela Cruz, mahimo man ini magresulta sa pagkaguba sang mga coral reefs kag iban pa nga importante nga marine habitats nga nagaserbe nga breeding kag feeding grounds sang nagkalain-lain nga klase sang isda.
Nagpanawagan man ang natungdan sa mga mangingisda nga magpili sang legal kag responsable nga pamaagi sa pagpangisda agud maprotektahan ang kadagatan kag masiguro nga may masaligan pa nga pagkukunan sang pangabuhi ang masunod nga henerasyon.
