Nadakpan sang Traffic Management Unit (TMU) sang Roxas City ang isa ka colorum nga E-Tricycle driver nga nagabiyahe sa sentro sang syudad nga wala sang nagakaigo nga prangkisa kag mga dokumento nga nagatugot sa iya nga magpasakay sang pasahero.
Sa interview sang Bombo Radyo kay Gonzalo Andrada, Head sang Traffic Management Unit (TMU) sang Roxas City, iya ginpahayag nga gilayon nila nga gin-monitor ang nasambit nga E-Tricycle matapos mabaton ang impormasyon parte sa viral nga video sini sa social media.
Suno kay Andrada, paagi sa CCTV footage, nasubay nila ang behikulo kag gindakop ang driver sini matapos mapamatud-an nga wala sang nagakaigo nga prangkisa kag permit para sa public transportation.
Gin-isyuhan man sang citation ticket ang driver bangud sa paglapas sa City Ordinance batok sa colorum nga mga salakyan.
Gin-athag man ni Andrada nga ginadumilian ang paggamit sang E-Tricycle bilang public transportation ukon ang pagpasakay sang mga pasahero bilang negosyo kon wala sang nagakaigo nga prangkisa kag lisensya, apang mahimo ini gamiton para sa personal nga katuyuan.
Samtang, nagapabilin ang penalidad nga P1,500 sa first offense, P3,000 sa second offense kag P5,000 sa third offense para sa mga colorum nga salakyan, lakip na ang E-Tricycle.
Dugang pa sang natungdan, padayon ang ila pagmonitor, ilabi na sa mga busy corners, intersections kag mga dalanon nga madamo sang nagalabay nga salakyan.
