Nagtaas sa 6.5 percent ang inflation rate sa probinsya sang Capiz sang Oktubre 2026, mas mataas kon ipaanggid sa 5.1 percent sang Setyembre 2026 kag 0.1 percent sang amo man nga bulan sang nagligad nga tuig.
Sa interview sang Bombo Radyo kay Rosiebelle A. Belluso, Senior Statistical Specialist kag Officer-in-Charge sang Philippine Statistics Authority (PSA) Capiz, ginpahayag sini nga ang transport sector ang may pinakadako nga amot sa pagsaka sang inflation sa probinsya.
Suno kay Belluso, nagrekord sang 25 percent nga inflation rate ang transport sector kag nag-amot sang 74.6 percent sa kabug-usan nga pagtaas sang inflation sang Oktubre.
Ginsundan ini sang Food and Non-Alcoholic Beverages nga may 4.4 percent nga inflation rate kag 20.4 percent nga amot, samtang 7.7 percent naman ang inflation rate sa Housing, Water, Electricity, Gas and Other Fuels nga may 3.7 percent nga amot.
Dugang pa sang natungdan, ginapakita sang datos sang PSA Capiz nga ang pagsaka sang presyo sa transportasyon amo ang nangin panguna nga rason sang mas mataas nga inflation rate sa probinsya sang Oktubre 2026.
