SUBLANGON, Pontevedra, Capiz – Na-discharge na sa hospital ang tatlo sa apat ka nasamaran, samtang isa pa ang padayon nga ginaobserbahan sa nagluntad nga vehicular accident sa Barangay Sublangon, Pontevedra, Capiz.
Matandaan nga kahapon nga adlaw ang driver 1 gindeklarar nga dead on arrival sang agttending physician sa hospital.
Ang driver 1 amo si alyas Naldo, 59-anyos, residente sang Barangay Ilaya, Pontevedra, Capiz, samtang ang driver 2 ginkilala sakay alyas Gardo, 62-anyos, residente sang Barangay Cagay, Roxas City kag ang pasahero sini amo sanday alyas Adelfa, Lito, kag Anelyn.
Sa interview sang Bombo Radyo kay Police Captain Maria Fe T Umiten, Officer in Charge sang Pontevedra Municipal Police Station, iya ginpahayag nga nag agaw sang linya ang driver sang top down kun sa diin kasugata niya ang trisikol nga may yara sang tatlo ka pasahero kag bangud sa mabaskog nga impact pareho sila nga nag apok kag nasamaran kun sa diin gin repondihan man ini insigida apang sa masubo nga balita gindeklarar nga dead on arrival ang driver 1.
Suno kay Umiten outpatient na ang driver 2 kag ang mag asawa nga si Lito kag Adelfa, samtang ang asawa naman ni alyas Gardo nga si alyas Anelyn padayon pa nga ginaobserbahan para sa nagakaigo nga pag monitor sa iya nga kondisyon.
Pahayag pa niya ginahimo nila ang tanan kag ang pagtipon sang ibidensya nga makabulig sa paghatag kag pagpa-athag sa natabo nga insidente.
Sa karon ginapahanumdom sa tanan nga motorista nga maghalong kag magmatinlo sa pagmaneho, likawan ang pag-agaw sang linya kag siguruhon nga nagasunod sa mga regulasyon sa dalan agud malikawan ang mga aksidente nga mahimo magresulta sa pilas ukon pagkawala sang kabuhi.
