Temporaryo nga magapungko bilang Acting Municipal Vice Mayor sang Sigma si Sangguniang Bayan Member Norman “Nene” Marcelino nga nag-umpisa sang Nobyembre 12, kasunod sang anum ka bulan nga preventive suspension nga ginpanaog sang Office of the Ombudsman kay Vice Mayor Stephen Alayon.
Sa interview sang Bombo Radyo kay Marcelino, ginpahayag sini nga siguruhon niya nga matuman sing husto ang iya mga responsibilidad bilang acting vice mayor kag masunod ang nagakaigo nga proseso sa pagserbisyo sa publiko.
Suno kay Marcelino, kabahin sang iya prayoridad ang pagbulig sa pagpatuman sang mga programa ni Mayor Dante Rizal Eslabon para sa kaayuhan sang mga pumuluyo sang Sigma.
Matandaan nga ginpatawan sang anum ka bulan nga preventive suspension si Alayon matapos nakitaan sang Office of the Ombudsman sang mabakod nga ebidensya sang posible nga grave abuse of authority kag oppression, may kaangtanan sa reklamo parte sa Usufruct Agreement sang Solar Water System Project sa Barangay Poblacion Sur kag Norte.
Samtang, ang temporaryo nga paglingkod ni Marcelino sa posisyon ang nagapasiguro sang padayon nga operasyon sang Sangguniang Bayan samtang nagapadayon ang proseso may kaangtanan sa kaso ni Alayon.
Nahibaluan nga nabaton na sang Sangguniang Bayan, Human Resource Management Office kag Municipal Local Government Operations Office sang DILG ang kopya sang suspension order halin sa Ombudsman, nga gilayon man nga ginpatuman.











