Ginkumpirma ni Sigma Capiz, Mayor Rizal Dante Eslabon nga may kaangtanan sa Solar Water System Project sa Barangays Poblacion Sur kag Poblacion Norte ang preventive suspension nga ginpanaog batok kay Vice Mayor Stephen F. Alayon.
Ang suspension order ginpagwa sang Office of the Ombudsman–Visayas sang Agosto 25, 2026, kasunod sang administrative complaint nga ginpasaka ni Eslabon sang Hunyo 2, 2026.
Sa interview sang Bombo Radyo kay Eslabon, iya ginpahayag nga nag-ugat ang reklamo sa pagpangayo sini kay Alayon sang otorisasyon para sa usufruct agreement nga may kaangtanan sa proyekto, apang wala ini maaprubahan bisan pa may pila na ka beses nga follow-up sa sulod sang siyam ka bulan.
Suno pa sa alkalde, amo ini ang rason kon ngaa nagpasaka siya sang reklamo sa Office of the Ombudsman batok kay Alayon.
Nahibaluan nga magafile naman si Vice Mayor Alayon sang Motion for Reconsideration agud pangayuon sa Ombudsman nga repasuhon liwat ang suspension order.
Samtang temporaryo nga nagapungko bilang Acting Municipal Vice Mayor si Sangguniang Bayan Member Norman “Nene” Marcelino.
Ang preventive suspension indi pa nagakahulugan nga napamatud-an na ang reklamo batok kay Alayon bangud padayon pa ang pag-usisa sang Ombudsman sa kaso.











