-- ADVERTISEMENT --

Nagpartisipar ang Bureau of Fire Protection (BFP), paagi sa Officer-in-Charge nga si FCSUPT Wilberto Rico Neil A. Kwan Tiu kag Deputy Chief for Operations nga si FCSUPT Fred L. Trajeras Jr., sa Critique Session sang PNP ASEAN Security Task Force.

Ang aktibidad nangin kahigayunan agud marepaso ang performance sang mga operasyon, mapabakod ang koordinasyon sa tunga sang nagkalain-lain nga ahensya sang gobyerno, kag matalupangdan ang mga aspeto nga kinahanglan pa pauswagon agud masiguro ang kaluwasan kag seguridad sang mga delegado, bisita kag publiko sa tion sang ASEAN Summit.

Bilang kabahin sang padayon nga pagpaninguha para sa kaluwasan sang publiko, padayon nga nagapabilin ang mga personnel sang BFP sa nagkalain-lain nga venue sang ASEAN Summit sa Metro Manila. Nagahatag sila sang Fire Protection, Emergency Medical Services (EMS), Rescue Operations kag iban pa nga espesyal nga serbisyo sa emerhensya.

Lakip sa mga emergency assets nga gin-deploy ang bag-o nga ginbakal nga DILG Unified 911 Ambulances nga magasuporta sa paghatag sang gilayon nga serbisyo medikal kag pagresponde sa emerhensya.

Sa karon, ginapanag-iyahan sang BFP ang pinakadaku nga organisado nga EMS workforce sa pungsod, nga may kapin sa 8,000 ka EMS personnel kag sobra 500 ka ambulansya sa bilog nga Pilipinas.

-- ADVERTISEMENT --

Paagi sa husto nga preparasyon, epektibo nga koordinasyon sa operasyon kag nagabinuligay nga pagresponde sang nagkalain-lain nga ahensya, ginpahayag sang BFP ang padayon nga dedikasyon sini sa pagsiguro sang malinong kag luwas nga paghiwat sang ASEAN Summit.

Padayon man nga ginapakita sang ahensya ang iya katutum sa pagproteher sang kabuhi kag pagserbisyo sa publiko.

Ginpasiguro sang BFP nga padayon ini nga handa kag dedikado sa pagserbisyo kag pagproteher sang kabuhi kag propiedad sang mga Pilipino.