Duha ka separado nga mass shootings ang narekord sa South Africa, kon sa diin 17 ka tawo ang napatay.
Ang pagpangluthang sa sulod sang isa ka minibus una nga narekord sa probinsya sang KwaZulu-Natal sa diin walo ka mga tawo ang napatay.
Suno sa lokal nga otoridad, nakabaton sila sang ginaalegar nga report sang pagpangluthang sa amo nga lugar. Sang nagkadto ang mga pulis didto, nakita nila ang isa ka puti nga pito ka pulungkuan nga salakyan nga puno sang mga bala, nga nagadala sang walo ka lalaki nga naigo sang mga bala kag wala na sang kabuhi.
Pila ka oras ang nagligad, isa pa ka mass shooting ang narekord sa isa ka payag sa western Pretoria nga nagbilin sang siyam ka patay.
Ang mga bangkay sang anum ka lalaki kag tatlo ka babayi nasapwan sa isa ka impormal nga puluy-an sa Atterigdeville. Suno sa isa ka katapo sang nasambit nga komunidad, abi nila ang lupok sang pusil nga ila nabatian sang amo nga gab-i ang lupok kag kilat lang.
Suno sa South African police, bisan pa nga wala sangg kaangtanan ang duha ka narekord nga insidente sang pagpangluthang, ginausisa pa nila ang amo nga mga insidente sang krimen agod mahibaluan ang motibo sa likod sini.
Naglunsyar na sang manhunt ang kapulisan agud matukiban ang mga suspetsado sa pagpangluthang.
17 ka mga indibidwal, patay sa duha ka separado nga mass shootings sa South Africa
-- ADVERTISEMENT --











