Nagapangatubang sang daku Nga pagbag-o ang Business Process Outsourcing (BPO) industry sa Pilipinas bangud sa madasig nga paglapta sang Artificial Intelligence (AI), nga mahimo magresulta sa linibo ka mga mamumugon nga madulaan sang trabaho bangud sa automation sang mga serbisyo.
Base sa report, ang workforce sa industriya sang BPO magalab-ot sa 1.89 million sa 2025, nga nagarekord sang 40.3 billion dollars nga kita.
Apang, ginabanta nga 306,000 ka mga mamumugon ang mahimo madulaan sang ila trabaho sa tuig 2030 bangod sang AI, lakip ang mga call center agent, data-entry clerk kag bank teller sa tunga sang mga trabaho nga posible nga mabuslan sang automation.
Bangud sini, ginpanubo man sang Information Technology and Business Process Association of the Philippines (IBPAP) ang ila target nga numero sang mga mamumugon sa 2.14 million sa tuig 2028, gikan sa nagligad nga 2.5 million kadungan nga ang target nga kita nagnubo sa 50.5 billion dollars gikan sa 59 billion dollars.
Ginhatagan pagtamod sang report nga kinahanglan nga magtutok sa paghanas kag pagpauswag sang mga ikasarang ang mga mamumugon agud makadungan sa AI technology kag magsaylo sa mas mataas nga lebel sang trabaho, sa baylo nga madula sang bug-os sa BPO industry.
AI, mahimo nga mangin kabangdanan sang pagkadula sang trabaho sa linibo ka mga mamumugon sa BPO industry sa Pilipinas
-- ADVERTISEMENT --











