-- ADVERTISEMENT --

SHENZHEN, CHINA-Nagtambong si President Ferdinand “Bongbong” Marcos Jr. sang Huwebes sang aga sa 33rd Asia-Pacific Economic Cooperation ukon APEC Economic Leaders’ Meeting sa Shenzhen, China, kaupod ang mga lider sang nagkalain-lain nga pungsod.

Sa ginpatigayon nga pagtililipon, nakita si Marcos nga nagapungko sa tunga nila ni Russian President Vladimir Putin kag Peruvian President Keiko Fujimori.

Nag-upod man sa nasambit nga APEC Economic Leaders’ Meeting sanday Chinese President Xi Jinping kag United States President Donald Trump, upod ang iban pa nga mga lider sang kalibutan.

Gintambungan ang APEC Economic Leaders’ Meeting sang mga lider sang 21 ka miyembro nga ekonomiya sang organisasyon agud pagahisgutan ang nagkalain-lain nga importante nga isyu may kaangtanan sa patigayon kag pagpamuhunan, pagpasayon sang mga proseso sa negosyo, kag kooperasyon sa ekonomiya kag teknolohiya.

Ang APEC ukon Asia-Pacific Economic Cooperation isa ka rehiyonal nga organisasyon nga nagatinguha nga mapalig-on ang kooperasyon kag pag-uswag sang ekonomiya sa rehiyon sang Asia-Pacific paagi sa mas mabakod nga pagbinuligay sang mga miyembro nga ekonomiya.

-- ADVERTISEMENT --