-- ADVERTISEMENT --

Naglab-ot sa kapin P1 million ang balor sang ginapatihan shabu nga nakumpiskar sang mga katapo sang Regional Police Drug Enforcement Unit 6 (RPDEU 6) sa ginpatigayon nga drug buy-bust operation sa Angel Ville, Barangay San Jose, Roxas City.

Ang subject person amo si alyas ‘Buraging’, 35-anyos,isa ka High Value Individual (HVI), anay Overseas Filipino Worker (OFW) kag residente sang nasambit nga barangay.

Sa interview sang Bombo Radyo kay Police Captain Dennis Losbañes, team leader sang Regional Police Drug Enforcement Unit 6, iya ginpahayag nga
nagresulta sa pagkadakop sang suspek ang ginpatigayon nga buy-bust operation matapos mabakal sang police poseur buyer ang isa ka sachet sang ginapatihan shabu halin sa subject person kabaylo sang P20,000 nga buy-bust money.

Suno kay Losbañes , indi lang isa ka sachet ang narekober sang mga operatiba bangud narekober man sa possession sang suspek ang dugang nga siyam ka sachet sang suspected shabu kag isa ka knot-tied plastic bag nga may unod man nga ginapatihan iligal nga droga.

Sa kabug-usan, nagabug-at sang ginabulubanta 150 gramos ang nakumpiskar nga suspected shabu nga may Standard Drug Price nga nagalab-ot sa P1,020,000.

-- ADVERTISEMENT --

Sa subong, yara na sa kustodiya sang kapulisan ang nadakpan nga subject person kag magapangatubang sang nagakaigo nga kaso bangud sa ginapatihan paglapas sa Republic Act 9165 ukon Comprehensive Dangerous Drugs Act of 2002.