IX, Roxas City – Aresatado ang duha ka street level individual “SLI”, matapos ang ginpatigayon nga drug buy-bust operation sa Railway Street, Barangay IX, Roxas City.
Matandaan nga ginpatigayon ang operasyon kahapon nga adlaw, sa takna sang 11:40 sang aga pinaagi sa joint elements sang Provincial Police Drug Enforcement Unit “PPDEU” kag Roxas City Police Station “RCPS” nga nagresulta sa madinalag-on nga pagka-aresto sang duha ka persona.
Ang suspek amo sanday alyas Michael, 46-anyos, kag alyas Camille, 39-anyos nga lunsay residente sang Barangay Dinginan, Roxas City.
Sa interview sang Bombo Radyo kay Police Major Rachelle D Garnica, Public Information Officer sang Capiz Police Provincial Office, iya ginpahayag nga sa ginpatigayon nga operasyon, nakumpiskar ang ginabulubanta 22.7 gramos sang ginapatihan shabu nga may standard drug price sang P154,360.
Pahayag pa niya lakip sa mga narekober ang 1 ka heat-sealed transparent plastic sachet sang ginapatihan nga shabu bilang Buy-bust Item; 4 ka heat-sealed transparent plastic sachets sa possession sang suspek; P3,500 bilang buy-bust money;P3,400 boodle money;P100 geniune bill with serial nuy; cellphone kag nagkalain-lain nga non-drug items.
Dugang pa sa impormasyon si alyas Michael base sa rekord anay na nga na aresto may kaangtanan sa paglapas sa Republic Act 10591 ukon Comprehensive Firearms and Ammunition Regulation Act kag naka-avail man ini sang plea bargaining agreement sang 2022.
Sa karon, yara na sa kustodiya sang Roxas City Police Station ang duha ka arestado para sa nagakaigo nga disposisyon kag pagpasaka sang kaso nga may kaangtanan sa paglapas sa Republic Act 9165 ukon Comprehensive Dangerous Drugs Act of 2002.











