Nagpauli si President Ferdinand Marcos Jr. sang binilyon nga investment pledges gikan sa iya pagbisita sa Shenzhen, China, sa diin posible nga makatuga sang masobra 7,000 ka mga trabaho para sa mga Pilipino.
Suno kay Marcos, nagsapol siya sa pila ka mga dalagko nga Chinese companies agud ma-engganyo ang mga ini nga mag-invest kag magpasangkad sang ila operasyon sa Pilipinas.
Lakip sa mga gin-istoryahan amo ang pagtukod sang pasilidad sang produksyon sang C&U Group sa Batangas, ang pagpasangkad sang operasyon sang BYD sa pungsod, kag ang mga plano sa pagpamuhunan sang Ming Yang Smart Energy Group sa enerhiya sang hangin sa baybayon.
Nagtambong man ang Presidente sa ika-33 nga APEC Economic Leaders’ Meeting, sa diin iya ginduso ang fair trade, seguridad sang mga supply chain, digital economy, kag pagpasangkad sang oportunidad para sa mga mamumugon nga Pilipino.
Samtang, ginpirmahan man sang Pilipinas kag Chile ang Comprehensive Economic Partnership Agreement (CEPA), ang una nga bilateral free trade agreement sa tunga sang Pilipinas kag isa ka pungsod sa Latin America.
Suno kay Marcos, katuyuan sang sini nga mga kasugtanan amo ang pagbukas sang bag-o nga mga merkado, pagganyat sang dugang nga mga pamuhunan, pagpasanyog sang mga lokal nga industriya kag pagtuga sang dugang nga kalidad nga trabaho para sa mga Pilipino.











