Ginpabutyag ni President Ferdinand “Bongbong” Marcos Jr. nga nagalibog ang iya ulo sa mga hublag protesta batok sa Pax Silica initiative sang USA.
Suno sa presidente, wala pa sang natapos nga kasugtanan angut sa kaangay nga inisyatibo kag wala pa sang natabo nga pagpirma rason nga nagalibog ang iya ulo sa mga protesta batok sa kaangay nga proyekto, nga suno sa iya wala pa pormal nga nakasugtan.
Ginpanindugan ni Marcos nga wala sang plano sa idalum sang nasambit nga inisyatibo nga magtukod sang data centers sa pungsod.
Dugang pa sini, ginsiling sini nga ang tinutuyo lamang sang proyekto amo ang pagpasangkad sang technological products kag pagpanagtag sang Pilipinas sa nagaluntad nga ekonomiya sang artificial intelligence.
Suno sa iya, ini man ang oportunidad sang pungsod nga makapakigbahin sa paghulma sang pangkalibutanon nga industriya sang artificial intelligence (AI) sa baylo nga mangin konsumidor lamang sang mga produkto sini.
Gin-engganyo man sang presidente ang pungsod nga hangpon kag batunon ang kasubong nga mga proyekto kag inisyatibo bangud sang mga kontribusyon suno sa iya nga mahatag sini sa ekonomiya sang Pilipinas, Southeast Asia kag sa bug-os nga kalibutan.
Sang nagligad nga mga semana, linibo ka mga tawo ang nagprotesta sa nagkalain-lain nga bahin sang kalibutan bilang pagpamatuk sa Pax Silica initiative sang US bangud sa pamahog sini sa kinaugali kag dunang manggad.
Nagbaskog ang panawagan para sa protesta ilabi na sa putukputukan sang ika-49 nga ASEAN Summit kag presensya ni US President Donald Trump sa pungsod.











