-- ADVERTISEMENT --

Naghatag sang panibag-o nga paglaum sa mga biktima sang kampanya kontra ilegal nga droga ang nagahilapit nga trial kay anay Pangulong Rodrigo Duterte sa International Criminal Court (ICC), matapos ang pila ka tuig nga paghulat nga mapanabat ang mga ginatudlo nga responsable sa mga gin-alegar nga paglapas nga natabo sa idalom sang kampanya kontra droga.

Sa eksklusibo nga interview sang Bombo Radyo Philippines, ginpahayag ni Truth Commission spokesperson Carlos Conde nga importante ang pagsugod sang trial indi lamang para sa mga biktima nga direkta kabahin sang kaso nga ginapamatian sa ICC, kundi pati man sa iban nga mga pamilya nga nagalaum nga makab-ot ang hustisya.

Suno kay Conde, bisan indi pa sigurado kon daw ano kadugay ang trial kag kon ano ang mangin desisyon sang mga hukom, importante gihapon ang kahigayunan nga maipaambit sang mga biktima ang ila mga eksperyensya sa atubang sang international community.

Gindugang pa ni Conde nga indi lamang ang mga biktima nga direktang kabahin sang kaso sa ICC ang nakabatyag sang paglaum, kundi pati ang iban pa nga mga pamilya nga naapektuhan sang kampanya kontra ilegal nga droga nga wala nalakip sa kasamtangan nga kaso.

Maga-umpisa nga sugdan sa Nobyembre 30, 2026 ang trial kay Duterte sa ICC may kaangtanan sa mga kaso nga crimes against humanity, lakip na ang murder kag attempted murder. May kaangtanan ini sa mga gin-alegar nga pagpatay sang panahon sang iya pagpungko bilang alkalde sang Davao City kag bilang presidente sang Pilipinas.

-- ADVERTISEMENT --