Naghiussa ang mga miyembro sang ASEAN Inter-Parliamentary Assembly (AIPA) nga pabaskugon pa ang ila kooperasyon sa seguridad, ekonomiya kag kaayuhan sang sobra 680 milyon ka pumuluyo sa Southeast Asia.
Ini ang yara sa Joint Communiqué nga gin-aprubahan sa pagtapos sang 47th AIPA General Assembly nga ginhiwat sa Manila, sa pagpanguna ni House Speaker Faustino “Bojie” G. Dy III.
Lakip sa mga importante nga isyu nga gintalakay sang mga mamalidha amu ang seguridad sa kadagatan, cybercrime, iligal nga droga, pagsaka sang presyo sang pagkaon, artificial intelligence (AI) kag proteksyon sang mga migrant workers.
Ginpabug-atan man sang mga mamalidha ang importansya sang pagsunod sa international law, lakip na ang United Nations Convention on the Law of the Sea (UNCLOS), kag mas hugot nga kooperasyon batuk sa mga krimen nga nagalab-ot sa mga border sang nagkalain-lain nga pungsod.
Sa bahin sang ekonomiya, ginsuportahan sang AIPA ang pagpalig-on sang suplay sang pagkaon, agrikultura, seguridad sa enerhiya kag trading sa rehiyon.
Nagpanawagan man ang grupo sang mas mabakod nga proteksyon para sa mga migrant workers batuk sa pagpangdaya sa recruitment kag human trafficking, upod ang mas maayo nga access sa edukasyon kag serbisyo medical.
Gintalakay man ang seguridad sang mga kabataan kag pamatan-on batuk sa nagkalain-lain nga katalagman sa internet.
Samtang, gin-abiabi ang Timor-Leste bilang ika-11 nga miyembro sang AIPA, samtang ginhatagan naman sang observer status ang mga parliyamento sang Serbia kag Spain.
Nagtapos ang assembly sa pormal nga pagbalhin sang pagpanguna sang AIPA halin sa Pilipinas pakadto sa Singapore, nga mangin host sang ika-48 nga General Assembly sa 2027, nga magatupong man sa ika-50 nga anibersaryo sang organisasyon.











