ROXAS CITY, CAPIZ – Ginpatpat sang isa ka abogado kun ano kabilidhon sa mga kababainhan ang layi nga Republict Act No. 11210 ukon ang 105-Day Expanded Maternity Leave Law.
Sa interview sang Bombo Radyo kay Atty. Krisha Dawn Bernolia, Bombo abogada, iya ginpahayag nga ang purpose sang nasambit nga layi agud protektahan ang welfare sang mga nkababainhan nga nagatrabaho nga nagabusong ukon manugbata kun sa diin ginhatagan ang mga ini sang malawig nga leave ukon bakasyon agud makapahuway kag maka-recover.
Suno kay Atty. Bernolia, kinahanglan maangkon sang isa ka nagapanarabaho nga babayi ang benepisyo sang maternity leave ano man nga sahi sang delivery sang iya pagbata ukon ano man ang status regarding sa legitimacy sang bata.
Panugyan sang natungdan nga kun pananglitan may mga employer nga indi magtuman sa amo nga layi, indi magpangduha-duha nga magpangayo sang bulig sa abogado ukon i-report sa DOLE kun nagatrabaho sa pribado nga kompanya kag sa Civil Service Commission naman kun empleyado sang gobyerno.
Nahibaluan nga may penalidad nga P20,000 ukon indi maglapaw sa P200,000 kag mahimo nga mapriso tubtob anom ka tuig ang magalapas sa nasambit nga kasuguan.
