CAPIZ- Gintalakay sang isa ka PR kag Marketing Practitioner ang kahulugan kag epekto sang Artificial Intelligence (AI) sa Pilipinas.
Sa interview sang Bombo Radyo kay Mr. Ken Lerona, ginpahayag nga ang AI isa lamang ka computer program nga ginahimo kag ginakontrolar sang tawo, kag indi ini makalapaw sa ihibalo sang tawo.
Dugang pa sini nga ang AI isa ka makina nga nagagamit sang datos kag instruksyon halin sa tawo.
Ginpatpat pa nya nga may madamo nga klase sang AI nga ginagamit subong, lakip na ang mga popular nga large language models, AI nga naga-identify sang mga balatian, naga-monitor sang klima, kag naga-manage sang traffic system.
Samtang, ginsiling sini nga ang AI daw kapareho sang kutsilyo — may ara ini sang positibo kag negatibo nga epekto. Isa sa mga peligro sang AI amo ang posibilidad nga magamit ini sa paghimo sang mga pekeng balita kag panikas.
Sa pihak nga bahin, ginpahanumdom sini nga kinahanglan nga may AI literacy ang tanan agud mahibaluan kun ano ang matuod kag ano ang peke nga impormasyon sa internet.
Pahayag pa ni Lerona, ang AI mahimo magamit sa propaganda kag pagpang-into, gani dapat mangin maalam kag responsable ang mga tawo sa paggamit sini.
Daku man kun makabig ang bulig sang AI para sa mga estudyante kag mga manunudlo, apang indi dapat kalimtan ang mga kahalitan nga mahimo sini.
Sa katapusan, ginpahayag niya nga indi na malikawan ang pag-uswag sang AI, pero ang importante amo ang responsible nga paggamit sini agud malikawan ang negatibo nga epekto.
With a report from Bombo Francis Biñas
