Liwat nga ginpakita ni Pinay tennis star Alex Eala ang iya mga ikasarang pagkatapos nga ginlutos ang world No. 8 nga si Elina Svitolina sang Ukraine, sa score nga 6-3, 6-4, sa quarterfinals sang Berlin Tennis Open.
Bangod sang kadalag-an, naka-abante si Eala sa semifinals kon sa diin maga-atubang ini sa Czech player nga si Linda Noskova.
Sa amo nga hampang, temprano nga nag-abante si Eala sang 3-0 sa una nga set antes nakabawi si Svitolina, apang nag-abante liwat ang Pinay kag ginsirado ang set sa score nga 6-3.
Pagsulod sang ikaduha nga set, nangin dikit ang ila hampang nga apang nagpangibabaw sa gihapon si Eala.
Suno kay Eala, isa ka kadungganan ang makahampang batok sa isa ka top player, kag ang kadalag-an ang nagmarka sang iya sunod-sunod nga kadalag-an batok sa Top 10 players sa WTA Tour.
