ROXAS CITY – Ginkumpirma sang alkalde sang President Roxas, Capiz ang pagpasaka sang nagakaigo nga kaso sa National Bureau of Investigation (NBI) batuk sa napulo ka mga tawo nga kalakip sa group chat nga nagaplano sang malain batuk sa iya kag nagaguwa sa iya nga pagkatawo.
Kasunod sini ang pagkumpirma man ni Mayor Receliste Escolin ang pagtestigo pabor sa kanya ni Manuel Delfin, ang lalaki nga nag-ako nga sadto nagabaton sang semanal nga nayad gikan sa grupo sang oposisyon para lamang gub-on ini.
Nagpanindugan pa ang alkalde nga kinahanglan sini nga aksyunan para indi na pagpamarisan sang iban.
Samtang ginpanginwala sang opisyal ang akusasyon sang isa ka senior citizen nga ginbastos kag ginpakahuy-an niya ini sa sulod sang munical hall.
Sa exclusive interview sang Bombo Radyo Roxas kay Mayor Escolin, ginpahayag sini nga wala sang kamatuoran ang akusasyon ni Mercedita Bejo sang Barangay Goce, President Roxas, bangud ginkumpronta lamang niya ini sa mga negatibo nga post sini sa facebook batuk sa iya.
Ginbuyagyag man sang alkalde ang group chat sang mga nagapakamalaut sa iya administrasyon sa diin wala nakaluwas ang pagkwestyon sa iya nga pagkatawo nga isa ka pagpakanubo sa iya pagkatawo bilang amay sang ila nga banwa.
