Ginpanawagan ni House Assistant Majority Leader Jude Acidre si Senador Imee Marcos nga untatan ang pagpalapta sang mga conspiracy theory kag magpokus sa iya obligasyon bilang senador sa nagapadayon nga impeachment trial batok kay Vice President Sara Duterte.
Suno kay Acidre, mas maayo nga tutukan sang mga senador ang patas kag insakto nga pagdumala sang impeachment proceedings imbes nga maghatag sang mga pahayag nga mahimo magdugang sang kalibog kag tensyon sa publiko.
Gindugang man niya nga indi dapat gamiton ang impeachment trial para sa personal ukon pamulitika nga interes, kundi kinahanglan nga mapabilin ang integridad sang proseso kag masunod ang Konstitusyon kag mga layi sang pungsod.
Nagguwa ang pahayag ni Acidre kasunod sang mga ginbuyagyag ni Marcos nga may yara kuno sang tinago nga mga plano kag impluwensya sa impeachment proceedings. Bangud sini, ginlaygayan niya ang senador nga maghalong sa iya mga ginapahayag agud malikawan ang paglapta sang wala napamatuoran nga impormasyon.
