PILAR, CAPIZ – Gin-athag ni Pilar Mayor Arnold Perez nga wala sang kahilabtanan ang mga local government unit sang Pilar ang ginpanagtag nga financial assistance gikan sa Chu-Chi Foundation sa mga nahalitan sang paglaslas sang bagyo nga Ursula.
Suno kay Perez nga wala sila nagalaum nga magapanghatag sang financial assistance ang nasambitan nga foundation bangud ang yara sa tarpaulin amo ang distribution sang relief goods.
Ginklaro ni Perez nga nagpa-assist lamang ang foundation sa ila kag mismo ang Chu-Chi foundation ang nag-identify sang pito ka mga barangay sa banwa sang Pilar.
Ginabulubanta nga masobra 500 ka mga pumuluyo ang nakabaton sang bulig pinansyal nagikan sa Barangay Sinamongan, Casanayan, San Ramon, San Esteban, Natividad, kag Poblacion kun sa diin ang nasambitan nga foundation ang nagvalidate sang mga pumuluyo nga makabaton sang 20mil, 15mil kag 10mil sa pihak nga may ginhatag nga lista ang mga barangay officials.
Aminado si Perez nga madamo sang mga pumuluyo sang pito ka barangay ang nagdanggup sa iya nga talatapan matapos nga wala makabaton sang bulig-pinansyal apang ginklaro man sini nga wala siya sang may mahimu bangud indi naghalin sa gobyerno ang kwarta.
Ginpanginwala sang alkalde ang mga alegasyon nga may yara sang tag-P5, 000 nga nabaton ang iban nga mga residente bangud may yara sang card nga ginpanghatag kun pila ang mabaton sang isa ka pumuluyo.
Gindugang ni Perez nga nagtambong lamang ini bangud naghatag sang opening message kag pagkatapos sini naglakat na ang alkalde.
Nagapanugyan si Perez sa mga pumuluyo nga magpasalamat na lamang sa bulig pinansyal nga nabaton gikan sa Chu-chi foundation bangud dako na ini nga bulig agud ipamakal sang materyales sa pagpatukod sa ila nga panimalay.
