ROXAS CITY -Arestado ang isa ka ‘alog’ matapos nga nadakpan sa ginkasa nga drug buybust operation sang Provincial Drug Enforcement Unit sang Capiz Police Provincial Office sa Sitio Nipa, Barangay Culasi Roxas City.
Ginkilala ang nadakpan nga si Jeyem Mendoza 23-anyos, tumandok sang Mandaluyong City apang temporaryo nga naga-estar sa Barangay Punta Tabuc sining siyudad.
Nakuha sa posesyon ni Mendoza ang 5 ka mga plastic sachets sang ginapatihan shabu, P2,000 nga buybust money, isa unit sang cellphone, kag P1,500 nga boodle money.
Ginpanginwala ni Mendoza nga ginpanag-iyahan sini ang mga nakuha nga shabu.
Suno kay Mendoza nga ginhatag gid lamang sa iya sang wala makilala nga persona ang nasambit nga shabu.
Ginpanginwala man sini nga nagamit siya sang iligal nga droga.
Samtang ginpahayag naman sang team teader sang PDEU nga si Police Lieutenant Mark Anthony Garcia nga masobra tatlo ka semana nila nga gin-monitor sang mga kapulisan si Mendoza sa pagduso sang ilegal nga droga.
Ginabulubanta naman nga isa ka bulto ang narekober nga shabu kay Mendoza nga may yara sang estimated market value nga P43,000.
