ROXAS CITY, CAPIZ — Liwat nga nagpangawat si alyas “Ruby” sa isa ka tindahan sa Barangay Banica, Roxas, City.
Sa interview sang Bombo Radyo kay Police Chief Master Sergeant Ramil Arcangeles, tigpamaba sang Roxas City PNP, ginpahayag niya nga nagpadulong ang tag-iya sang tindahan agud nga mag report sa pagpangawat ni Ruby.
Suno diri, ₱4,000 kag mga sigarilyo, nga amo ang kadam-an nga item nga ginkuha ni Ruby.
Mahibaluan nga sang damlag lang nagsulod man ini sa isa ka tindahan diri sa syudad sang Roxas kag may nakuha man ini nga kuwarta.
Suno kay Arcangeles, isa sa ila mga concern, sa tion nga mabawi na sang mga biktima ang ila mga gamit nga ginkawat, wala na ang mga ini nagapasaka sang kaso bangud para sa ila maawat kag nagausik lang sila sang oras.
Pahayag pa niya, bisan pa mag-file ang kapulisan sang kaso, kun wala sang complainant nga magtindog bilang saksi, mahimo gihapon ini madismis sa korte.
Dugang ni Arcangeles, nga wala sang dapat bayaran ang mga biktima kun sila ang nagapasaka sang kaso kag ang kinahanglan lamang diri amo ang ila kooperasyon kag handa nga magtindog bilang witness batok sa mga suspek.
Sa karon, gina-hulat pa ang desisyon sang tag-iya sang tindahan kun magpasaka siya sang kaso batok kay alyas Ruby.
