Nakalusot sa pagkapreso ang isa ka amay nga nagpangawat sang gatas sa tindahan para sa iya nga bata sang ginbayadan na lang sang hepe sang Tabuk City Police Station sa Kalinga ang gatas bangud sa kaluoy. May iban pa nga ginhimo si hepe para sa lalaki.
Base sa report sang kapulisan, naaktuhan sa Closed Circuit Television (CCTV) camera sang tyangge ang ginhimo nga pagpangawat sang amay sa sang gatas.
Gindala sa police station ang amay, gin-imbistigaran kag didto natukiban sang hepe nga nadulaan sang trabaho ang amay kag ginbayaan sang asawa rason nga siya na lang ang nag-ataman sa bata.
Agud nga indi na maakusaran kag maprespo, ginpakita sang hepe sang Tabuk City Police Station nga si Police Lieutenant Colonel Jack Angog, ang kaluoy kag paghangop sa sitwasyon sang amay, kag ginbaydan na lang ang gatas.
Ginsiling man ni Angog nga ginbuligan nila ang amay nga makakita sang bag-o nga trabaho.
“Naintindihan naman natin yung case ng suspek kaya sabi ko bayaran na lang natin, nakakaawa naman. Sabi ko huwag nang uulitin ‘yan. Ang ginawa natin, tinulungan din natin maghanap ng trabaho para hindi na maulit,” suno kay Angog, nga nag-angkon sang pagdayaw sa mga netizen bangud sa iya nga ginhimo.
