ROXAS CITY – Nagbaliskad ang isa ka ambulansiya matapos gin-arado ang isa ka tindahan sa Sitio Buta, Barangay Jolongajog, Pontevedra, Capiz.
Sakay sa ambulansiya sang President Roxas Local Government Unit ang driver nga si Gary Bejo 45-anyos sang Barangay Ibaca, President Roxas kag tatlo ka responder nga sanday John Charle Villanueva, Edelyn Patricio kag John Robert Almonte.
Sa interview sang Bombo Radyo Roxas sa driver nga si Bejo, ginpahayag sini nga mahinay ang iya nga pagpadalagan sang salakyan, apang hinali nga nag-untat ang Montero Sport nga yara sa iya unahan, gani iya ini ginlikawan.
Apang hinali ini nga nadulaan sang preno kag nagdiretso sa isa ka tindahan sa kilid sang karsada.
Bangud sa impact nagbaliskad ang ambulansiya kag nawasak ang palayas sang tindahan.
Nahibaluan nga gikan sa Roxas City ang ambulansiya nga nagdul-ong sang pasyente kag nagapauli na sang nagluntad ang aksidente.
