-- ADVERTISEMENT --

Ginpanindugan sang grupo sang Anakbayan nga sa baylo nga ipain ang daku nga pondo sang gobyerno para sa pag-host sang ASEAN Summit, kuntani gingamit ini sa pagsabat sa mga kinahanglanon sang sektor sang edukasyon.


Sa interview sang Bombo Radyo kay Matt Gonzaga, Anakbayan National Vice President for Visayas, nagpabutyag sang pagkadismaya bangud kaangay nga ginatago sang gobyerno ang matuod nga kahimtangan sang kapigaduhon sa pungsod agud mapresentar ang maayo nga imahe sang Pilipinas sa mga foreign leaders nga magatambong sa nasambit nga international event.


Suno kay Gonzaga, indi dapat pagtaguon sang gobyerno sa mga ASEAN Leaders ang mga problema nga ginapangatubang sang pungsod, partikular ang kapigaduhon kag kakulang sang nagapanguna nga serbisyo, bangud nagakadapat ini nga hatagan sang nagakaigo nga atensyon kag solusyon.

Gindugang sini nga ang pondo nga ginpain para sa ASEAN Summit mahimo kuntani nga magamit sa pagsabat sa kakulang sang hulot-klasehan, pasilidad kag iban pa nga kinahanglanon sang mga estudyante kag manunudlo.

Samtang, ginapamatukan man sang Anakbayan ang ginaalegar mga kasugtanan may kaangtanan sa pax silica, exploitation sang natural resources kag ang pagbisita ni United States President Donald Trump sa Pilipinas nga kabahin sang ginakabalak-an sang grupo.

-- ADVERTISEMENT --