Pormal na nga gin-endorso ni anay DILG Secretary Mar Roxas sang Liberal party ang liwat nga pagpapili nanday Capiz 1st District Congressman Emmanuel ‘’Tawi’’ Billones Sr. kag Roxas City Mayor Ronnie Dadivas sa maabot nga 2022 Nationald and Local Elections.
Sa ginpatigayon nga press conference sang LP sa isa ka lugar sa Barangay Baybay sining syudad kaina sang aga, gindeklara ni Roxas ang kandidatura ni Billones sa pagka-kongresista sa premier distrito sang probinsiya kag alkalde sang Roxas City si Dadivas.
Wala ginhinambit sa nasambit nga kahiwatan ang mangin standard bearer sang partido sa posisyon sa pagka-gobernador.
Ginatugyan man ni Roxas sa mga city kag provincial leaders ang pagpili sa ila luyag nga mangin ka-tandem.
Naghinyo man sang suporta si Roxas para sa kandidatura nanday Billones kag Dadivas nga ginhimo ang ila responsibilidad agud maserbisyuhan ang mga Capizeño, partikular sini nga gintumod ang inisyatibo ni Mayor Dadivas nga pagpanagtag sang bugas sa mga taga Roxas samtang si Congressman Billones naman ang nagapangita sang pondo sa national level para sa dugang nga proyekto nga mahatag sa probinsiya.
Pag-abot naman sa pamilya del Rosario suno kay Roxas nga nag-estorya sila ni anay Governor Antonio del Rosario nga nagsiling indi sila magseparar sa LP, apang wala sang klaro nga posisyon sa ila.
Ginpanindugan man ni Roxas nga wala na ini sang plano nga magpadalagan sa bisan ano nga posisyon kag magasuporta na lamang ini sa iya mga kapartido kag magabulig sa kutob sa iya masarangan karon nga may pandemya nga ginasuprer ang bilog nga kalibutan.
Ginkumpirma ni Capiz 1st District Congressman Emmanuel ‘’Tawi’’ Billones Sr. nga kumpleto na ang mga kandidato sa kabanwahanan sa premier distrito samtang ginatugyan kay Capiz 2nd District Congressman Fredinil Castro ang mga kandidato sa segundo distrito.
