ROXAS CITY –Arestado ang 35-anyos nga anay preso matapos nga nadakpan sa ginkasa nga Drug Bust Operation sa gintingub nga puwersa sang Station Drug Enforcement Team (SDET) sang Pontevedra Municipal Police Station kag Provincial Drug Enforcement Unit (PDEU) sa Barangay Tabuc, Pontevedra Capiz.
Ginkilala ang arestado nga si Jennifer Bedeo alyas Pandot sang Barangay Poblacion, President Roxas, Capiz.
Narekober sa posesyon ni Bedeo ang apat ka mga plastic sachets sang ginapatihan nga shabu, P500 nga buybust money, isa ka unit sang cellphone, P17,000 nga boodle money kag mga drug paraphernalia.
Ginabulubanta nga yara na sa kapin 5 gramos ang kabug-aton sang mga narekober nga shabu sa diin may yara sang market value nga P34,000.
Matandaan, nga nabilanggo na anay si Bedeo bangud man sa pagduso sang iligal nga droga apang nakaguwa man ini pinaagi sa plea bargaining.
Natalana naman nga pasakaan sang panumbongon nga paglapas sa R.A. 9165 ukon Comprehensive Dangerous Drugs Act of 2002 si Bedeo.
