ROXAS CITY – Gintalakay sa ginpatigayon nga session sang provincial board sang Sangguniang Panlalawigan ang Annual Investment Program para sa tuig 2021.
Ini ang ginpahayag ni Board Member Jonathan Sonny Besa, Chairman sang Committee on Finance and Appropriation sang mainterview sang Bombo Radyo.
Suno kay Besa nga gintalakay nila ang Annual Investment Program nga gin-insister sang Provincial Development Council kaupod ang pila ka mga ahensya magluwas lamang sa DepEd-Capiz nga wala nagtambong apisar nga ikatatlo ka beses na nila ini ginpadal-an sang imbitasyon.
Nahibaluan nga kalakip kuntani sa hinalaan ang budget nga ginapangayo man nila para sa pagpatukod sang isa ka radio station sa probinsya para sa radio based education kag para man sa special education fund.
Magluwas diri, gin-aprubahan man ang Solo-Parent Welfare Ordinance of the Province of Capiz nga magahatag benepisyo para sa mga solo parent.
Ginpahayag sini nga nagdihon sila sang Implementing Rules and Regulations para sa nasambit nga ordinansa sa pagpanguna sang Provincial Social Welfare and Development Office kag Solo-Parents Task Force.
Dugang pa sini nga may yara sang hiwaton nga province wide registration agud maisyuhan sang ID ang mga solo parent agud makabenepisyo sila sang mga programa kapareho sang scholarship sa ila mga kabataan, pangabuy-anan, trabaho kag bulig pinansyal nagikan sa gobyerno.
Samtang, ginahulat na lang sa karon sang Sangguniang Panlalawigan nga mapirmahan ni Capiz Gov. Esteban Evan Nonoy Contreras agud dalayon na nga mangin laye ang nasambit nga ordinansa.
