Gin-athag sang isa ka health expert nga ang anxiety indi lang isa ka sahi sang mental health disorder kundi may yara ini sang nagkalain-lain nga kategorya.
Sa interview sang Bombo Radyo kay Dr. Caressa Lynn Siglos, Psychometrician/Testing Coordinator sang Capiz State University Main Campus, iya ginpahayag nga ang anxiety mahimo maghalin sa paglikaw sang isa ka tawo sa mga sitwasyon nga dapat kuntani gina-develop agud mangin komportable siya.
Suno kay Dr. Siglos, mahimo man sini maapektuhan ang genetics ukon family history, kag sang pagbatyag sang indi secure nga may daku nga epekto sa mental well-being sang isa ka tawo.
Pahayag niya, ginakinahanglan ang therapy sa mga nakaeksperyensya sang anxiety, upod ang suporta kag pag-intindi sang pamilya kag mga tawo sa palibot.
Dugang pa sang natungdan, ang husto nga pagbulig kag pagbatyag nga may naga-sabat sa ila kahimtangan amo ang makabulig agud mabuhinan ang epekto sang anxiety sa adlaw-adlaw nga kabuhi.
ANO NAMAN ANG DEPRESSION?
Samtang, ginpatpat naman ni Dr. Siglos nga ang depression ang isa ka daku nga pagbag-o sang mood kag pagkadula sang gana ukon interes sa mga butang nga sadtu ginakalipay sang isa ka tawo.
Lakip sa mga sintomas sang depression ang pagbag-o sang appetite, kabudlay sa pagtulog kag pagbangon, low energy, kag pagbag-o sang psychomotor skills.
Pahayag niya, ang kabudlay sa paghimo sang mga desisyon, naga-apekto sa performance sang isa ka tawo sa eskwelahan ukon sa trabaho.
Ginapanugyan man sang natungdan nga mangin mabinatyagon ang tagsa-tagsa, ilabi na gid sa mga estudyante, kag mangin mabinuligon ang mga tawo sa palibot agud matapna kag mabuligan ang nagaeksperyensya sang depression.
