Temporaryo nga indi magamit ang apat ka classrooms sang Talon Elementary School sa Barangay Talo, Roxas City kasunod sang pagtay-og ang magnitude 6.9 nga linog nga nabatyagan ang Intensity IV sa syudad.
Sa interview sang Bombo Radyo kay City Councilor Fernando Luis Viterbo , iya ginpahayag nga sa iya pag-inspect sa eskwelahan, nakit-an sini nga nag-usmod ang flooring kag nakaangkon sang litik ang mga pader sang hulot-klasehan.
Suno kay Viterbo, madugay na nga may damage ang nasambit nga hulot kag nadugangan lamang ini bangud sa linog.
Pahayag pa niya, ginrekomenda sang City Engineering Office kaupod ang school authority nga i–cordon anay kag indi paghiwatan sang klase ang mga classrooms nga naapektuhan samtang ginahulat pa nga ini ang kaayuhon.
Dugang pa sang natungdan, nagapadayon ang inspeksyon sang Roxas City Government kaupod ang City Engineering Office sa mga eskwelahan sa bilog nga syudad agud masiguro ang seguridad sang mga estudyante kag manunudlo.
Interviewed by: Bombo Sunnie Mae Batencila via Bombohanay Bigtime
