Ginbawi sang apat sa 18 ka mga nagpakilala nga anay bodyguards ni dating Congressman Zaldy Co ang ang ila una nga mga alegasyon batok kay President Ferdinand Marcos Jr., anay House Speaker Martin Romualdez, Co, kag iban pa nga personalidad.
Sa ila bag-o nga affidavit, ginpahayag nila nga wala sang kamatuoran ang ila una nga mga statement parte sa ginaalegar pagdeliver sang maleta nga may kwarta.
Suno sa ila, nagpirma sila sang una nga joint affidavit bangod sa promisa nga bulig pinansyal kag seguridad para sa ila pamilya.
Apang, nagdesisyon sila nga bawion ini bangod sa gin-alegar nga mga pamahog sa ila kabuhi kag mga kaso nga ila ginatubang.
Tatlo sa apat ang nagsiling nga ang ila una nga affidavit amo ang ginsumiter sa Office of the Ombudsman, nga ginagamit subong sa imbestigasyon batok kay Romualdez kag iban pa.
Ginpahayag man nila nga ginpapirmahan sila sang affidavit nga ginpreparar na kag ginpahog nga pasakaan sang kaso kun indi magtuman.
Apang, ginpahayag sang mga ginatawag nga “maleta boys” nga boluntaryo nila nga ginsulat kag ginpirmahan ang ila bag-o nga affidavit.
Suno sa ila, duha ka bulan nila ini ginbinag-binag antes magdesisyon nga bawion ang una nila nga statement.
Posible man nga may iban pa nila nga kaupdanan nga magbawi sang ila alegasyon.
