ROXAS CITY – Ginpaiway sang Archdiocese sang Capiz ang pagpatigayon sang pila ka mga aktibidad may kaangtanan sa Semana Santa sa bulan sang Abril bangud sang pamahog sang Coronavirus Disease (COVID-19).
Sandig sa Circular No.06 nga gin-isyu sang arsobispo sa diin gintalana ang Pastoral and Health Directives angut sa COVID-19.
Ginapatpat ni Father Jose Arturo Emilio Arbatin ang mga aktibidad nga ginpaiway sang simbahan bilang kabahin sa mga hilikuton sa cuaresma ukon kag Semana Santa.
Yari ang pila ka mga aktibidad nga ginpaiway: una diri, ang pagpaiway sang Via Crucis apang ginarekomendar ang pagpangadi sa sulod sang balay, chapel kag simbahan.
Ikaduha ang pagkansela sang Kumpisalang Bayan ukon Confession sa baylo magahatag sang general absolution ang simbahan.
Ikatatlo, ang pagtambong sang Lenten Recollection ukon Retreat nga mag-obserbar sang isa ka metros ang distansia ukon kalayuon sa kada isa.
Ikaapat, ang pagpaiway sang pagbisita sang mga Apostoles sa mga panimalay.
Ikalima, ang wala sang prusisyon sa guha sang simbahan sa Dominggo de Ramos.
Ikaanum, indi obligado ang mga tumuluo nga magpadulong sa simbahan agud saksihan ang washing of the feet ukon ang paghugas sang tiil sang mga apostoles.
Ikapito, ang Siete Palabras sa mga simbahan ang igapabati na lamang pinaagi sa radyo ang ginpreparar nga mensahe sang mga kaparian.
Ikawalo, ipaiway man ang Paghalok sa Krus.
Ikasiyam, ang pagpatigayon sang Prusisyon kada Biyernes Santo ukon pagprusisyon sang mga Paso.
Apisar may ginpaiway ukon ginkansela nga mga aktibidad sa cuaresma ukon Semana Santa wala ini sang tinituyo nga bag-ohon kundi ini ang ila nga tikang sa pamahog sang COVID-19 para mapabilin ang kaluwasan sang publiko.
