Narekober sang mga kapulisan ang nagkalain-lain nga kalibre sang armas-luthang sa gin-raid nga balay sa Brgy. Poblacion Norte, Ivisan, Capiz.
Sa inisyal nga impormasyon nga nakuha sang Bombo Radyo News Team sa lugar, ginkilala ang subject person kay Rudgil Villar Uguil, 43-anyos, negosyante sang tahong kag residente sang nasambit nga lugar.
Suno kay 2nd Capiz Police Mobile Force Company (CPMFC) Officer-in-Charge PLTCOL Francisco Paguia, gin-implementar ang search warrant bangud sa mga report nga ginpalab-ot sa ila nga nagapinalupok ang subject kag nagahatag ini sang kakugmat sa mga kalapit balay.
Samtang, suno naman kay Kagawad Acuyado, may daan na nga kaso ang nasambit nga subject person.
Sa pagpakig-angut sang Bombo News Team sa asawa sang suspek, ginkumpirmar sini nga may daan na nga kaso sa pagpangbuno ang iya bana apang ginpanginwala sini ang mga narekober nga mga armas kag iligal nga droga.
Magluwas sa mga armas, lakip sa narekober sa balay sang subject amo ang granada, ginaalegar iligal nga droga kag mga motorsiklo.
Sa karon, nagapadayon pa ang imbentaryo sang mga otoridad sa mga recoveries.
