Nangin madinalag-on ang mission sang Artemis II matapos nga hilway nga nakabalik sa Earth ang mga astronaut halin sa ila historic nga paglibot sa bulan.
Ang misyon ginkalakipan sang apat ka astronaut nga sanday mission commander nga si Reid Wiseman, pilot nga si Victor Glover, mission specialist nga si Christina Koch, kag astronaut sang Canadian Space Agency nga si Jeremy Hansen.
Suno kay Bombo Mary Drake, international correspondent sa Estados Unidos, iya ginpahayag nga ginakabig nga isa ka dako nga milestone ang una nga manned mission nga naglibot liwat sa bulan matapos ang madamo nga tuig.
Dugang pa niya, apisar maayo ang kondisyon sang mga astronaut, kinahanglan sa gihapon nga ipaidalom sa medical check-up agud masiguro ang ila kahimtangan sa posible nga epekto sa ila pagbiyahe sa kalawakan.
Ang amo nga mission nagdala man sang bag-o nga datus kag mga kuha halin sa bulan kag kalibutan nga makabulig sa palaabuton nga mga exploration.
Nagalaom ang National Aeronautics and Space Administration (NASA) nga masundan ini sang Artemis III nga may plano nga magbalik sang tawo sa bulan sa masunod nga mga tuig.
