Wala nagpaulihi ang mga atleta sang probinsiya sang Capiz nga kabahin sang delegasyon sang Western Visayas sa 2025 Palarong Pambansa nga ginapatigayon sa Ilocos Norte.
Sa interview sang Bombo Radyo kay Mr. Ronie Reteracion, Sports Officer sang Department of Education – Capiz Division, iya ginpahayag nga ang mga humalampang nagikan sa Capiz ang nagahatag man sang puntos sa delegasyon sang Western Visayas bangud nakakuha ang mga ini sang mga medalya sa nagapadayon nga mga hinampang.
Suno kay Reteracion, lakip sa mga nagapangibabaw nga atleta sang Capiz sa Palaro amo si Angel Villagracia nga nakuha ang bulawan nga medalya sa 100-meter hurdles.
Si Villagracia ang tumandok sang banwa sang Pontevedra kag estudyante sang Capiz National High School ang nakakuha man sang gold medal sa Palarong Pambansa 2024. Nahibaluan nga tatlo na ka magkasunod nga tuig nakakuha sang bulawan nga medalya si Villagracia sa Palaro.
Pahayag pa ni Reteracion, nakakuha man sang medalya ang mga humalampang sang Capiz sa pila ka sports event kasubong sang Table Tennis – Secondary nga may isa ka silver kag Table Tennis – Elementary Girl nga may duha ka silver.
Balantayan naman ang dugang nga mga hinampang subong nga adlaw sa pagpadayon sang 2025 Palarong Pambansa kag lauman suno diri nga madugangan pa ang medalya sang Western Visayas.
Base sa Partial and Unofficial Results, nagapabilin nga nagapanguna ang National Capital Region nga may 13 ka bulawan nga medalya, 8 ka silver kag 3 ka bronze; nagapangaduha ang Region IV-A nga may 11 na ka bulawan nga medalya, 9 ka silver kag 6 ka bronze; samtang pangatlo naman ang Western Visayas nga may 6 ka gold, 5 ka silver kag tatlo ka bronze.
