Nagpanugyan ang Philippine National Police (PNP) sa publiko nga likawan ang pag-post sang ‘ATM’ ukon at the moment sa social media subong nga Holiday Season agud malikawan man nga mangin biktima sang mga kawatan nga nagapanaka-saka sa balay sa tion nga wala ini sang tawo ukon nagbakasyon.
Ginpahayag ni PNP Public Information Officer chief PBGen. Jean Fajardo nga kinahanglan nga mangin mahinalungon ang publiko subong nga Kapaskwahan kun sa diin nagaatake man ang mga kawatan.
Dugang pa sini nga madamo ang magabakasyon kag isaulog ang Paskwa gani dapat nga siguraduhon sang publiko nga may bastante nga suga kag CCTV ang ila nga balay.
Suno pa kay Fajardo nga nakig-angut naman ang PNP sa mga barangay nga magapatigayon sang pag-ronda sa ila nga nasakupan.
Samtang, ginpahanumduman man ni Fajardo ang mga motorista nga siguraduhon nga yara sa maayo nga kondisyon ang ila mga salakyan antes magbiyahe.
Siguruhon nga may bastante nga tulog kag wala nakainom para makalikaw sa disgrasya.
