Ginpahayag ni President Ferdinand Marcos Jr. kahapon nga adlaw nga bukas siya sa pagbalikay sang maayo nga relasyon sa pamilya Duterte, kag iya ginhatagan pagtamod nga luyag niya nga makig-ugyon sa tanan.
Ginhimo sang Presidente ang pahayag matapos nga ginpamangkot siya sa una nga episode sang iya nga podcast kun gusto niya nga kay-uhon ang indi maayo nga relasyon sa pamilya Duterte.
Nahibaluan nga naglalala ang relasyon ni Marcos Jr. sa pamilya Duterte sadtong una nga quarter sang 2024 matapos gin-akusaran siya nanday Former President Rodrigo Duterte kag anak sini nga si Davao Mayor Sebastian Duterte bilang isa ka mahina nga lider kag gin-alegar nga adik sa cocaine.
Sadtog tunga-tunga sang 2024, nagbiya si Vice President Sara Duterte gikan sa Gabinete ni Marcos Jr., kag sang ulihi ginpakamalaot ang anay niya nga kaalyado kag mga kaupod sini bangud sa ginaalegar iregularidad sa administrasyon.
Labi pa nga nagdalom ang banggianay matapos imbestigaran sang Kamara — sa pagpanguna sang pakaisa ni Marcos Jr. nga si Ferdinand Martin Romualdez — ang confidential funds sang opisina sang bise presidente, kag sang ulihi ginbothan agud i-impeach ini bilang Vice President sang pungsod.
Sadtong Marso 2025, gintugutan sang administrasyon ang pag-aresto kay Former President Rodrigo Duterte kag gindala siya sa Netherlands kun sa diin siya ang nagapangatubang sa mga kaso nga crimes against humanity sa atubang sang ICC.
Liwat nga ginbasol ni Vice President Duterte si Marcos Jr. kag ang iya administrasyon sa pag-aresto sa iya amay kag ginpahayag nga wala ini sang legal nga basehan bangud nag-atras na ang Pilipinas sa Rome Statute sadtong 2019.
