Pilason ang isa ka babaye matapos matiruhan sa Sitio Anangue, Barangay West Villa Flores, Maayon, Capiz.
Ang biktima kay alyas Ching,57-anyos samtang ang ginatudlo suspek amo si alyas Noel, 30-anyos, single, laborer kag lunsay residente man sang nasambit nga lugar.
Sa interview sang Bombo Radyo kay Police Captain Danilo Lauron, Officer in charge sang Maayon Municipal Police Station, iya ginpahayag nga mapauli kuntani ang biktima upod sa iya bana kag timbang sa balay halin sa tindahan sang ila makita ang suspek nga nagahigda sa duta kag may nakasukbit nga armas-luthang sa iya hawak.
Suno kay Lauron, gintinguhaan sang biktima nga kuhaon ang armas apang nag-inagaway sila sang suspek tubtob nga aksidente nga naglupok ang armas kag naigo ang nawala nga paa sang biktima.
Nag-angkon sang pilas ang biktima nga madasig naman nga gindala sa pinakamalapit nga ospital para sa pagbulong.
Samtang boluntaryo naman nga nagsungka ang suspek sa opisyal sang sang nasambit nga barangay.
Sa subong, nagapabilin sa kustodiya sang Maayon Municipal Police Station ang suspek para sa nagakaigo nga disposisyon samtang padayon pa subong ang imbestigasyon angut sa insidente.
