ROXAS CITY – Nagpabutyag sang reklamo ang isa ka bag-o nga empleyado sa isa ka mall matapos makabaton sang indi maayo nga pagtrato sa iya halin sa guard kag isa ka staff sang opisina sang kumpanya.
Sa interview sang Bombo Radyo Roxas kay alyas “Jim”, iya ginpahayag nga ginsiyakan kag ginpakahuy-an siya sang isa ka staff sa atubang sang madamo nga tawo bangud lamang sa iya uniform nga nagalukot.
Suno sa iya, aware man ini sa iya sudlan nga trabaho nga bawal ang lukot nga uniform rasun gani nga iya ini ginplantsa sang gab-i palang antes nga magsulod kuntani sa iya nga trabaho sang aga.
Dugang pa sini, nga nag-agi ini sa isa ka Guard, apang ginsita ini nga lukot ang iya nga uniform kag ginhalaan sang indi maayo nga tinaga.
Pahayag pa sini, nga gusto lang man sini tani nga magtimakas nga makaubra apang nakaekspersyensya ini sang indi maayo nga pagtrato sa iya.
Bangud sa natabo, ginkuha na lang ni “Jim” ang iya mga requirements kag ginpili nga indi na lang ipadayon ang iya sini nga trabaho.
Nagpalab-ot man ini sang mensahe nga tani sa sunod bag-uhon nila ang ila nga batasan sa mga empleyado nga bag-o pa lang kag hatagan man sang gamay nga respeto pareho sa pagrespeto man sila bangud pareho man lang ini sila nga isa ka empleyado agud wala ka sang may matapakan nga iban ka tawo.
Interviewed by: Bombo Sunnie Mae Batencila
