ROXAS CITY – Ginkakugmat sang mag-iloy ang natabo nga pagpangawat sa ila balay, kun sa diin ginpanggapos pa ang mga ini sang duha ka mga wala makilala nga kawatan.
Natabo ang insidente mga alas-3 sa kaaganhon, Hunyo 22, sa Puente Acuña subdivision, Barangay Dayao, sini nga syudad.
Sa interview sang Bombo Radyo sa tagbalay nga si alyas “Jane” 35-anyos, isa ka nurse sa pribado nga ospital, nabugtawan sini nga may isa ka lalaki nga yara sa iya kuwarto, gintutukan ini sang matalom nga bagay sa iya li-og kag ginpaandaman nga indi magsinggit agud indi mapatay, kag gilayon gingapos gamit ang cord sang charger.
Ginpadulongan man sang isa ka suspek ang kuwarto sang iya 66-anyos nga Iloy, gingapos kag gindala sa ground floor agud ipatudlo ang gintaguan sang ila alahas.
Nataban sang wala makilala nga mga suspek ang mga masunod:
Ipad gen nagabalor P40,000
4 kulintas nagabalor P48,000
2 ka pulseras nagabalor P21,000
2 ka pares sang aritos nagabalor P5,700 kag
P2,900 nga kuwarta
Nahibaluan nga nagsaka sa ikaduha nga panalgan ang mga suspek, kag nagsulod-paguwa sa bintana.
Narekober sa guwa sang kudal sa amu nga balay, ang duha ka pares sang tsinelas nga ginapatihan panag-iya sang mga suspek.
Natigayon nga ma-trace ang ginkawat nga Ipad padulong sa direksyon sang Panay kag nagpundo ang lokasyon sa Panay Market, apang napaslawan ang mga kapulisan nga madakpan ang mga kawatan.
Nagapadayon sa karon ang imbestigasyon angut sa nasambit nga insidente.
