ROXAS CITY – Nakalab-ot na sa atensyon sang pamunuan sang Barangay San Jose, Roxas City ang mga alegasyon nga madamo sang nagakalatabo nga hokus pokus sa Angelville Subdivision sa nasambit nga barangay.
Ini ang ginkumpirmar ni Punong Barangay Albert Calipayan sang mainterview sang Bombo Radyo Roxas.
Suno kay Calipayan nga madamo na ini sang may nabatian nga istorya angut sa pagparenta kag pagbaligyaanay sang mga housing units sa nasambit nga lugar apang wala man sang may nagreklamo natuhoy diri.
Ginpahayag sini nga sa tion nga mapamatud-an nga may yara nagakahinabo nga hokus pokus sa mga housing units, gilayon ini nga pagaaksyonan tubtob nga makalab-ot sa pamunuan sang National Housing Authority (NHA).
Ginpanginwala man sini ang mga alegasyon nga may ginapanag-iyahan nga units ang mga Barangay Kagawad sang amo nga barangay.
Apang, ginkumpirmar sini nga may yara sang mga pumuluyo nga nakaangkon sang units pinaagi sa “pagrisgo”.
Ginpahayag sini nga may isa ka pirmado nga waiver kun sa diin mahimo nga mapahalin ang isa ka persona sa tion nga bawion sang NHA ang housing unit nga gintiniran.
Suno kay Calipayan nga nagsugod ini matapos ang pagpanalasa sang Bagyong Ursula sang tinalikdan nga tuig 2019 kun sa diin madamo sang mga pumuluyo ang naapektuhan kag nadulaan sang puloy-an.
Ginpahayag sini nga madamo sang mga pumuluyo sa syudad ang nagapadulong sa talatapan sini kag naghinyo nga kun mahimo makaangkon sang kaugalingon nga housing unit.
Dugang pa sini nga wala sang kinamatarong ang mga opisyal sang barangay nga pahalinon ang iban nga mga pumuluyo bangud wala pa maturn-over sang NHA ang mga housing units sa syudad sang Roxas.
Suno diri nga naga-asister lamang ang mga opisyal sang barangay sa tion nga may luyag nga mag-avail sang pabahay apang ginpahayag sini nga wala na sang bakante.
(PHOTO FROM WEB)
