Pormal nga ginlunsar subong nga adlaw ang Bantay Senado, isa ka non-partisan citizens group nga magabantay kag magatutok sa mga matabo sa Senado, ilabi na sa impeachment trial batok kay Sara Duterte.
Suno sa grupo, ang ila tikang wala nagapakita sang suporta ukon pagsupak sa ikaduha nga pangulo, kundi nagatuyo nga masiguro nga ginatuman ang constitutional process kag ginahatagan sang importansya ang papel sang publiko sa impeachment proceedings.
Ang Bantay Senado ginabug-usan sang mga estudyante, young professionals, abogado, miyembro sang academe kag civil society organizations. Ginpabutyag nila nga ang desisyon sa impeachment trial dapat magabase sa ebidensya kag balaod kag indi sa pulitika ukon personal nga interes.
Lakip sa mga plano sang grupo ang pagpatigayon sang regular nga town hall meetings sa mga eskwelahan, barangay, simbahan kag komunidad agud mapalapnag ang impormasyon parte sa impeachment process. Magalunsar man sila sang nationwide signature campaign para dasigon ang mga senador nga himuon ang ila katungdanan bilang senator-judges nga may pagkamatarong kag patas.
Sa pagsugod sang impeachment trial, magatukod man ang grupo sang mga “community watch venues” sa nagkalain-lain nga bahin sang pungsod agud sabay-sabay nga mamonitor ang mga hitabo sa Senado.
