ROXAS CITY – Padayon ang pagpatigayon sang Barangay Punta Tabuc sining syudad sa pagpanglimpyo sa ila palibot agud matapna ang balatian nga dengue.
Ini ang ginpahayag ni Kapitan Nestor Buenviaje, Punong Barangay sang Punta Tabuc sang mapakig-angutan sang Bombo Radyo.
Suno diri, mas ginpasagkad niya ang pagpanglimpyo matapos may 3 na ka kaso sang dengue ang ila barangay kun sa diin 1 diri ang aktibo, apang ginsiling man sini nga ang ulihi nga kaso ginapatihan nakuha sa iban nga lugar suno man sa pamilya sang biktima.
Nagpatigayon man ang kapitan sang pagsinapol kaupod ang iya opisyales sa barangay, Barangay Tanod kag BHW agud mapalapnag sa pumuluyo ang impormasyon angut sa pagtapna sang nasambit nga virus.
Dugang sini, nagpatigayon sila sang search and destroy, clean up drive, kag nagpang-spray ilabi na sa mga buluthoan bangud sa nagahilapit na ang bukas klase, buwas nga adlaw magahiwat man ang ila barangay sang bloodletting para sa mga nabiktima sang dengue.
May kaangtanan naman sa nagabara nga kanal, ginsiling ni kapitan nga nagapangita na sila sang paagi agud makailig ang tubig lapos sa Panay River ilabi na subong nga tig-ululan kun sa diin nagaawas ang kanal kag dako nga perwisyo sa pumuluyo.
Panugyan ni Kap Buenviaje sa iya pumuluyo, magsunod sa instruction sang barangay kag magpartisipar sa ila aktibidades para sa madasig nga pagkadula sang balatian nga dengue.
Sa pihak nga bahin, ginpakigbahin man ni kapitan nga excited na siya sa palaabuton nga eleksyon kun madayon man kag ginapanugyan sa pumuluyo ang pagpili sang ila luyag nga mangin lider sang barangay.
