ROXAS CITY – Ginpakigbahin sang Brgy.Tanod kag isa sa mga lupon ang ila nakita natuhoy sa ginaalegar paghampak ni Brgy. Kagawad Romeo Agusan sa likod ni Mr. Aurelio Santiago, asawa ni kapitana sang tinalikdan nga Setyembre 14 sang aga sa Brgy. Hall sang Dinginan sining syudad.
Matandaan nagpalab-ot sang reklamo si Aurelio matapos ginaalegar ginhampak siya sa likod ni Kagawad Agusan kag ginhambalan nga indi mag-intra sa ginahusay sa sulod sang Barangay Hall.
Ginpanginwala naman ni Aurelio nga naga-intra siya kag yara lamang siya sa guwa sang hulot sa ikaduwa nga padalgan kun sa diin ginapatigayon ang paghusay.
Samtang ginpahayag naman ni Agusan nga ginkablit niya lang sa abaga kag ginsaway si Aurelio.
Sa interview sang Bombo Radyo kay Barangay Tanod Arnel Villanueva, yara siya sang natabo ang insidente bangud didto man nagatrabaho ang iya asawa, nangin kaupod niya si Aurelio sadto nga tion nga nagdul-ong kay kapitana.
Ginsiling ni Villanueva nga manugtapos na ang husay sang nagatindog sila sa pertahan ni Aurelio kag sang tresyurer kag ila nabatian nga nangin maayo ang resulta sang paghusay kag diri naghinun-anon sila, apang indi man mabatian sang mga ginahusay kag sang mga lupon nga yara sa sulod.
Dugang pa sini nga nagmuno si Aurelio nga maayo nga nagkasugot na ang mga ginahusay sang hinali nalang nabatian ni Villanueva nga may naglagubo kag diri niya nakita si Aurelio nga nagliso ang lawas bangud sa impact, ginakabig sini nga indi hampak kundi sunggab ang iya nabatian bangud man sa lagubo.
Posible suno diri nga wala nila natalupangdan nga nag-abot si Agusan kag tama-tama man nga nabatian sini ang paghambal ni Aurelio.
Matapos sini ginpamangkot suno diri ni Aurelio si Agusan kun ngaman ginpatup-an siya sini kag ginsabat naman siya ni Agusan nga indi mag-intra sa ginahusay sa Barangay bangud wala siya sang labot, kag gilayon man ini nga nagpanaog sa Brgy. Hall.
Wala naman ini suno diri ginpadako ni Aurelio kag nagpauli nalang, apang nakita ni Villanueva nga ginabatyag ni Aurelio ang sakit sa likod sang iya abaga.
Ginsiling naman ni Lupon ng Barangay Danilo Alair nga ulihi niya na natalupangan ang natabo nga komosyon sa tunga sang duwa bangud nakapokus siya sa iya ginahusay kag wala ini nakabati nga nag-intra sa ila ang asawa ni Kapitana.
Nagpanindugan si Villanueva kag Alair nga wala sila sang may gina-apinan kag ba-se lamang ang ila ginpahayag sang nagluntad ang insidente.
