Nagpanugyan ang Bureau of Fire Protection (BFP) sa publiko nga maghalong kag likawan ang mga aktibidad nga mahimo magtuga sang sunog bangud sa posible nga epekto sang Super El Niño.
Sa interview sang Bombo Radyo kay FCINSP Arden G. Bedoña, Acting City Fire Marshal sang Roxas City Fire Station, iya ginpahayag nga kinahanglan mangin responsable ang mga pumuluyo kag likawan ang pagsunog sang basura, kag iban pa nga materyales, ilabi na sa mga lugar nga madamo sang uga nga mga patanom nga mahapos magkalayo.
Dugang pa ni Bedoña, ginapahanumdom man sang BFP ang publiko nga siguruhon nga nakapatay kag na-unplug ang mga electrical appliances kon wala na ini ginagamit agud malikawan ang posibilidad sang sunog.
Ginapangabay man sang BFP ang publiko nga magreport gilayon sa pinakalapit nga estasyon sang bombero kon may makita nga sunog ukon iban nga emerhensya.
