Nagapatigayon na sang verification ang Bureau of Immigration (BI) nahanungod sa travel history kag legal status sang Chinese national nga naaresto kahapon, Abril 29 sa Intramuros, Manila nga may dala nga mga surveillance device.
Ini kasunod sang request sang National Bureau of Investigation (NBI) sa nasambit nga opisina nga iberipika ang estado sang nasambit nga Chinese nga yara sa karon sa pungsod.
Narekober sa suspek ang Chinese passport kag tourist visa para sa Pilipinas.
Sa nangin operasyon sang NBI, narekober sa salakyan sang suspek ang International Mobile Subscriber Identity (IMSI) catcher, isa ka device nga sarang mangolekta sang datus kag impormasyon gikan sa mga cellphone malapit sa nasambit nga device.
Ginakahangaw-an sang NBI nga ang nasambit nga Chinese ang nagakuha sang mga election-related information.
Igapaidalom man sang NBI ang mga nakumpiskar nga kagamitan sa cyber forensic examination agud matumod kun ano na kadamo ang mga nakolekta nga impormasyon kag mga datus, ilabi na nga pila na ka beses suno diri ginlibot ang Commission on Elections (Comelec) central office.
Sa karon yara na sa NBI detention facility ang nasambit nga suspek.
