ROXAS CITY — Desidido nga magpasaka sang reklamo sa Ethics Committee sang Sangguniang Panlalawigan sang Capiz si Board Member Jonathan ‘Sonny’ Besa batuk kay Board Member Eleuper Martinez matapos alegar nga ginpakitaan ini sang dirty finger ni Martinez samtang siya ang nagatugda sa ila executive session sadtong Mayo 10.
Suno kay Besa, luyag sini nga hatagan sang aksyon ang indi maayo nga pamatasan nga ginpakita sang iya kaupod sa sanggunian nga si Martinez bangud posible magapadayon pa ini kun indi nga daan mahatagan sang pagtamod.
Ginpahayag ni Besa nga isa ka unethical kag ungentleman act ang ginpakita ni Martinez kag nagakadapat nga maimbestigahan sang sanggunian.
Sa pihak sini, nakahanda man si Besa nga batunon kun pormal nga magpalapit kag magpangayo sa iya sang pasaylo si Martinez angut sa natabo.
Mahibaluan nga makapila na ini ka beses nga may natabo nga pagsingki-anay sa tunga sang duha ka mga opisyal.
