MANILA, Philippines – Ginpatuman sang Bureau of Customs “BOC”, ang tatlo ka tuig nga validity sang Customs Brokers sa idalom sang Client Profile Registration System ukon CPRS agud kag masiguro nga lehitimo kag compliant lamang nga practitioners ang makatransaksyon sa ahensya.
Suno sa pahyag sang BOC, ginmandu ini paagi sa memorandum nga ginpirmahan ni Ariel Nepomuceno sang Mayo 13.
Sa idalom sini, ang Certificate of Registration sang Individual Customs Brokers kag General Professional Partnerships magabalido lamang sulod sang tatlo ka tuig halin sa petsa sang pag-isyu, luwas na lamang kon masuspinde ukon mareboka antes sini bangud sang paglapas sa regulasyon.
Gintugyan naman sa Management Information Systems and Technology Group ang pagpatuman sang memorandum agud ma-update ang CPRS kag iban pa nga customs electronic systems para maipakita ang bag-o nga validity period kag mapunggan ang mga brokers nga wala sang balido nga rehistro sa pagproseso sang goods declarations.
Samtang, ginmandu man sa Accounts Management Office nga hugot nga ipatuman ang tatlo ka tuig nga validity period sa pagproseso, pag-apruba kag pagmonitor sang Customs Broker registrations lakip na ang validation kag cleansing sang mga existing records agud masiguro nga naka-angay ini sa Customs Administrative Order No. 05-2019.
Dugang pa niya, importante nga mapabilin nga husto kag updated ang registration records sang mga brokers agud masiguro nga ang mga duly registered kag may active CPRS profiles lamang ang makatransaksyon sa BOC.
Kabahin ini sang padayon nga tikang sang BOC sa pagpalig-on sang regulatory compliance, pagpaayo sang monitoring mechanisms kag pag-modernisa sang sistema paagi sa digitalization kag systems integration para sa mas transparent kag masaligan nga customs environment.
